Хитой инвестицияларни ривожлантириш агентлиги билан музокаралар бўлиб ўтди

Жорий йил 26 май куни Ўзбекистон Республикаси Инвестициялар ва ташқи савдо вазирлиги ҳузуридаги Хорижий инвестицияларни жалб этиш агентлиги (UZIPA) вакиллари ва Хитой Халқ Республикаси Тижорат вазирлиги ҳузуридаги Инвестицияларни ривожлантириш агентлиги (CIPA) Халқаро алоқалар департаменти бошлиғи Ванг Вен иштирокида видеоконференция бўлиб ўтди. Онлайн музокаралар мамлакатимизнинг Хитойдаги элчихонаси кўмагида ташкил этилди.

Тадбир чоғида UZIPA раҳбарияти томонидан CIPA вакилларига Агентликка қизиқиш билдирилгани ва ривожланаётган глобал пандемия пайтида фаолиятни мажбурий равишда пасайтиришга тўғри келгандан сўнг Хитой ва Ўзбекистон ўртасидаги ҳамкорликни йўлга қўйгани учун миннатдорчилик изҳор этган ҳолда UZIPA нинг мақсад ва вазифалари ҳамда унинг республикамиз ҳудудида инвестиция лойиҳаларини амалга оширишдаги роли ва инвесторларга кўмак бериш тўғрисида маълумот берилди.

Ўз навбатида, Ванг Хон ҳам йиғилганларни CIPA нинг чет элдан Хитойга инвестицияларни жалб этишдаги муҳим роли ва турли хорижий мамлакатларда инвестиция фаолиятини ривожлантириш учун маҳаллий инвесторларни рағбатлантириш бўйича Агентликнинг фаолияти билан яқиндан таништирди.

Суҳбат чоғида у бугунги кунда CIPA нинг устувор йўналишларидан бири бу – келажакда ўзаро фойда олиш ва тўғридан-тўғри хорижий инвестицияларни жалб қилиш соҳасида ноу-хау ва билимлар алмашиш мақсадида тегишли идоралар билан қўшма ишларни ривожлантириш эканини таъкидлади. Шунингдек, ҳозирги глобал вазият туфайли CIPA мавжуд платформаларда Агентлик билан биргаликда онлайн конференция ва форумлар ташкил этиш таклифини билдирди.

CIPA директорининг ўринбосари Агентлик манфаатдор хитойлик инвесторларни жалб қилиш мақсадида Ўзбекистон бозори билан яқин ҳамкорлик қилиш учун платформа яратиш истиқболларини кўриб чиқаётганини таъкидлади.

UZIPA раҳбарияти Хитой агентлиги мутахассисларига Ўзбекистон инвестиция портали – invest.gov.uz сайти ва бу ерда Ўзбекистондаги иқтисодий саноатларнинг ривожланиши борасидаги маълумотлар ҳамда салоҳиятли лойиҳаларни амалга ошириш бўйича мавжуд таклифлар билан таништирди.

Видеоконференция якунида Ванг Хон хитойлик сармоядорлар учун Хорижий инвестицияларни жалб этиш агентлиги Ўзбекистон бозорига киришда боғловчи восита сифатида муҳим ўрин эгаллаши мумкинлигини таъкидлади.

Учрашув иштирокчилари томонидан Ўзбекистоннинг Хитой Республикасидаги элчихонасига видеоконференцияни ташкил этишдаги кўмаги учун миннатдорчилик билдирилди.