Oʻzbekistonda investitsiya loyihasini amalga oshirish qonunchilikda belgilangan bir qator tartib-taomillarni bajarishni talab etadi. Ushbu tartib-taomillar qonuniy asosda faoliyat yuritish, yer maydoniga boʻlgan huquqlarni rasmiylashtirish, qurilishga ruxsat olish hamda obyektni kommunal xizmatlarga ulash imkonini beradi.
Zarur tartib-taomillar loyihaning xususiyati va koʻlamidan kelib chiqib belgilanadi. Odatda, ular JShShIR olish, kompaniyani davlat roʻyxatidan oʻtkazish, litsenziya va ruxsatnomalarni rasmiylashtirish, yer maydoniga boʻlgan huquqlarni rasmiylashtirish, qurilish tartib-taomillarini amalga oshirish hamda kommunal xizmatlarga ulanishni oʻz ichiga oladi. Loyihaning sohasi va oʻziga xos xususiyatlariga qarab qoʻshimcha ruxsatnomalar hamda kelishuvlar talab etilishi mumkin. Tartib-taomillar ketma-ketligi loyihaga qarab farqlanadi, ayrim jarayonlar esa bir vaqtda amalga oshirilishi mumkin. Har bir bosqichning maqsadi, amalga oshirish tartibi, muddati va tegishli davlat xizmatlari bilan tanishish uchun kartochkani oching.
JShShIR — jismoniy shaxsning shaxsiy identifikatsiya raqami boʻlib, Oʻzbekistonning davlat axborot tizimlarida qoʻllaniladigan noyob 14 xonali identifikatordir. Xorijiy fuqarolar davlat va boshqa rasmiy xizmatlardan foydalanish maqsadida JShShIRni belgilangan tartibda olishlari mumkin. JShShIR bir marta beriladi hamda pasport almashtirilganda yoki uning rekvizitlari oʻzgarganda ham saqlanib qoladi.
Xorijiy investorlar Oʻzbekistonda mamlakat qonunchiligiga muvofiq yuridik shaxslar tashkil etishi mumkin. Kompaniyani Yagona interaktiv davlat xizmatlari portali (YIDXP, my.gov.uz) orqali onlayn yoki Davlat xizmatlari markazida roʻyxatdan oʻtkazish mumkin.
Litsenziya, ruxsatnoma va xabarnoma — uch xil tartib-taomil boʻlib, ular bir-birining oʻrnini bosmaydi. Qaysi biri kerakligi faoliyat turiga bogʻliq. «Litsenziya» elektron tizimida buni aniqlash, talablarni oʻrganish va onlayn ariza berish mumkin.
Yer maydoni deyarli har qanday investitsiya loyihasining asosidir. Ishni boshlashdan oldin uchastkaning huquqiy maqomi, belgilangan maqsadi, ruxsat etilgan foydalanish turi, maydoni, joylashuvi, infratuzilma bilan taʼminlanganligi va cheklovlar mavjudligini tekshiring. Ushbu boʻlimda oldindan aniqlangan yer maydoniga oid tartib-taomillar bayon etilgan. Yer maydonini ajratish tartibi uning toifasi, belgilangan maqsadi va mulkchilik shakliga bogʻliq. Biz yer maydonini tanlash va olish masalalari boʻyicha maslahat berishga tayyormiz.
Yangi obyekt qurish yoki mavjud obyektni rekonstruksiya qilishda qonunchilikda belgilangan shaharsozlik va ruxsat berish tartib-taomillariga rioya etish talab etiladi. Tegishli talablar obyektning vazifasi, toifasi va texnik koʻrsatkichlariga bogʻliq.
Bu bosqich loyihalash bilan parallel ravishda oʻtishi mumkin (V bosqich, 2-qadam): texnik shartlarni loyiha yakunlanishini kutmasdan soʻrash mumkin. Ular obyektni elektr, gaz, suv taʼminoti, oqova suvlarni chiqarish va issiqlik taʼminoti tarmoqlariga ulash uchun zarur. Texnik shartlar — tarmoq tashkiloti obyektni qanday shartlarda ulash mumkinligini koʻrsatadigan hujjat. Texnik shartlarning oʻzi hali ulanish degani emas: bu alohida keyingi qadam.
Biz amaldagi talablar bo'yicha maslahat berish, investitsiya loyihangiz uchun zarur boʻlgan tartib-taomillarni aniqlash hamda vakolatimiz doirasida maslahat berish xizmatlarini taqdim etamiz.
Biz bilan bogʻlanish