Coca‑Cola Bottlers Uzbekistan Ltd
«Coca-Cola Bottlers Uzbekistan» MChJ XK O‘zbekistondagi eng yirik alkogolsiz ichimliklar ishlab chiqaruvchisi bo‘lib, «Coca-Cola» litsenziyasi asosida faoliyat yuritadi. Kompaniya xalqaro sifat standartlariga rioya qilgan holda suv, sharbatlar va gazlangan ichimliklarni o‘z ichiga olgan keng turdagi mahsulotlarni ishlab chiqaradi va tarqatadi. «CCBU»ning ishlab chiqarish quvvatlari Toshkent, Namangan va Urganch shaharlarida joylashgan.
2021-yilning sentabr oyida Turkiyaning «Coca-Cola İçecek A.Ş.» (CCI) kompaniyasi «CCBU» (Coca-Cola Bottlers Uzbekistan) aksiyalarining 57,118 foizini qariyb 252,28 million AQSH dollariga sotib olish bitimini yakunladi; bu esa ishlab chiqarishni modernizatsiya qilish, eksportni kengaytirish hamda xalqaro sifat standartlarini joriy etishga yo‘naltirilgan investitsiyalar hajmini oshirish imkonini berdi.
2024-yilda «CCBU» O‘zbekistonda ikkita yangi zavod qurish uchun 165 million AQSH dollari atrofida sarmoya kiritishini e’lon qildi: ulardan biri Samarqand viloyatida yillik ishlab chiqarish quvvati 280 million litrgacha, ikkinchisi esa Namangan viloyatida rejalashtirilgan quvvati 198 million litr bo‘lgan korxonalardir. Ushbu loyihalar ish o‘rinlari yaratilishiga, infratuzilmaning rivojlanishiga hamda hududlarning eksport salohiyatini oshirishga xizmat qiladi.
«CCBU» o‘zining ishlab chiqarish maydonlarida barqaror infratuzilmani rivojlantirish va zamonaviy texnologiyalarni tatbiq etishda faol ishtirok etmoqda. Shuningdek, kompaniya ijtimoiy va ekologik tashabbuslarni, jumladan, qadoqlash materiallarini qayta ishlash hamda suv resurslaridan oqilona foydalanish dasturlarini qo‘llab-quvvatlaydi.
Kompaniya faoliyati O‘zbekistondagi ichimliklar sanoatini mustahkamlaydi, ishlab chiqarishning xalqaro standartlarini o‘zlashtirishni rag‘batlantiradi, mahsulot sifatining yuqori bo‘lishini ta’minlaydi hamda sohaning investitsiyaviy jozibadorligini oshiradi.