BYD Uzbekistan Factory
2023-yil oktabr oyida «BYD» kompaniyasi O‘zbekiston Respublikasi Investitsiyalar, sanoat va savdo vazirligi bilan investitsiya shartnomasini imzolab, mahalliy ishlab chiqarishni rivojlantirish bo‘yicha o‘zining uzoq muddatli majburiyatlarini tasdiqladi. Kompaniya O‘zbekiston bozoriga 2024-yil yanvar oyida «Jizzax» erkin iqtisodiy zonasida ishlab chiqarishni yo‘lga qo‘yish orqali kirib keldi. Mazkur loyiha O‘zbekistonning sanoatni modernizatsiya qilish, ekologik toza texnologiyalarni joriy etish hamda barqaror transport tizimiga o‘tish bo‘yicha strategik ustuvor maqsadlariga to‘liq mos keladi.
Loyihaning asosiy yo‘nalishi - yangi energiya manbalarida harakatlanuvchi (NEV) elektromobillar va gibrid avtomobillar, shuningdek, «BYD» brendi ostidagi avtomobil butlovchi qismlarini ishlab chiqarishdan iborat. Bitim to‘liq ishlab chiqarish siklini, jumladan, kuzov payvandlash, bo‘yash va yig‘ish jarayonlarini yo‘lga qo‘yishni nazarda tutadi. Loyiha bosqichma-bosqich amalga oshirilmoqda. Dastlabki bosqichda yillik ishlab chiqarish hajmi taxminan 50 000 ta avtomobilni tashkil etishi, keyinchalik mahalliylashtirish darajasi va ehtiyot qismlar ishlab chiqarish ko‘rsatkichi izchil oshirib borilishi kutilmoqda. 2027-yilga borib esa zavod yillik ishlab chiqarish quvvatini 500 000 tagacha avtomobilga yetkazishni maqsad qilgan.
Ikki yil ichida «BYD» bilan hamkorlikda Jizzax shahrida ixtisoslashtirilgan avtomobil ishlab chiqarish korxonasi - «BYD Uzbekistan Factory» zavodi qad rostladi. 2024-yil iyun oyida zavod 160 million AQSH dollari miqdoridagi dastlabki investitsiyalar va yiliga 50 000 ta avtomobil ishlab chiqarish quvvati bilan elektromobillar ishlab chiqarishni boshladi. Keyingi bosqichlarda 300 million AQSH dollari miqdoridagi qo‘shimcha sarmoyalar va loyihaning yanada kengaytirilishi evaziga ishlab chiqarish hajmini bosqichma-bosqich 200 000 taga, yakunda esa yiliga 500 000 ta elektromobilga yetkazish rejalashtirilgan.
«BYD» zavodining ishga tushirilishi ilg‘or ishlab chiqarish texnologiyalarining tatbiq etilishi, yangi ish o‘rinlarining yaratilishi hamda avtomobil ehtiyot qismlarini yetkazib berish bo‘yicha mahalliy zanjirning rivojlanishiga xizmat qiladi. Ushbu loyiha iqtisodiyotni diversifikatsiya qilishga salmoqli hissa qo‘shadi, yangi energiya manbalarida ishlovchi avtomobillar global bozorida O‘zbekistonning mavqeini mustahkamlaydi hamda mamlakatning ekologik barqaror harakatchanlikka o‘tish jarayonini qo‘llab-quvvatlaydi.