Буюк Британия ҳукумати кўмагида Тошкент халқаро молия маркази концепцияси ишлаб чиқилади

Буюк Британия ҳукумати Тошкент Халқаро молия маркази (TIFC) концепциясини ўрганишнинг иккинчи босқичини бошлаш учун техник кўмак беришни маъқуллади.

Бу ҳақда Буюк Британиянинг Ўзбекистон Республикасидаги элчиси Тим Торлот Капитал бозорини ривожлантириш агентлиги, Тошкент шаҳар ҳокимлиги, Инвестициялар ва ташқи савдо вазирлиги, Адлия вазирлиги, Ташқи ишлар вазирлиги ва Ўзбекистон Республикасининг Буюк Британиядаги элчихонаси раҳбарияти иштирокида ўтказилган онлайн-конференция чоғида маълум қилди.

Лойиҳа концепцияси Буюк Британиянинг молиявий ва юридик хизматларни кўрсатувчи етакчи компанияларини бирлаштирган TheCityUK (www.thecityuk.com) иштирокидаги идоралараро ишчи гуруҳ томонидан тайёрланади. Буюк Британиянинг Ўзбекистондаги элчихонаси кўмаги билан ушбу лойиҳанинг мақсадлилиги борасида тайёрланган дастлабки таҳлил якунланган бўлиб, танишиб чиқиш учун жорий йилнинг ёзида тақдим қилинган.

– Лойиҳанинг моҳияти ноёб молиявий ва ҳуқуқий экотизимни шакллантириш учун мақбул моделни ҳамда унинг тўлиқ ишлаши учун зарур инфратузилмани аниқлашдан иборат. Дунё бўйлаб кўплаб молия марказларида (масалан, Нью-Йорк, Лондон, Гонконг, Сингапур, Дубай, шунингдек, Остона шаҳри маркази (AIFC) қўлланиладиган халқаро қоида ва стандартлар умумий ҳуқуқ (common/English law) тамойилларига асосланади, – дея хабар бермоқда Ўзбекистон капитал бозорини ривожлантириш агентлигида.

Бундай ҳуқуқнинг афзалликлари, уларнинг мослашувчанлигида ва фойдаланишда қулайлигида, шунингдек, жаҳон инвестиция ҳамжамияти томонидан кенг қўлланилишидадир.

Манба: www.review.uz 

Материал Хорижий инвестицияларни жалб этиш агентлиги томонидан ўзбек тилига таржима қилинди.