Покистон йирик компанияларининг топ-менежерлари Қорақалпоғистонга ташриф буюришди

Покистоннинг йирик “AKD Group”, “Tahir Asad Industries” ва “Farm Dynamics Pakistan” каби йирик компанияларининг топ-менежерлари минтақанинг инвестициявий муҳити билан танишиш ва инвестор-маҳаллий шерик-ҳокимият-саноат” форматида аниқ лойиҳаларни амалга ошириш имкониятларини муҳокама қилиш учун Қорақалпоғистон Республикасига ташриф буюрдилар.

Сафар чоғида покистонлик ишбилармонлар Қорақалпоғистон Республикасининг инвестициялар ва ташқи савдо вазири Бахытжан Хабибуллаев, “PanaMilk”, “PanaFarms”, “Orient Tecnology” ҚК, ФХ “Темур”, “Тахиатош паррандачилик фабрикаси” МЧЖ, “Prime Agro Commodities” маҳаллий корхоналари раҳбарлари билан учрашдилар ҳамда таклиф этилаётган инвестиция лойиҳалари билан танишдилар, шунингдек, қурилаётган Nukus City, Зарб ва вакуумли музлатиш Кегейли маркази, “Қорақалпоқбалиқсанааты” корхонаси ҳамда Қишки помидор ишлаб чиқариш бўйича Кегейли ихтисослаштирилган иссиқхонасига ташриф буюрдилар.

Покистон делегацияси, шунингдек, Қонликўл ва Тахиатош туманларида, “Тахиатош” кичик саноат зонаси объектларида ҳам бўлишди.

Ташриф давомида ўтказилган музокаралар натижасида Тахиатош туманида қўшма лойиҳаларни амалга ошириш бўйича бир қатор келишувларга эришилди. Хусусан, томонлар ҳамкорлигида замонавий паррандачилик фермаси, экологик ферма-кластери яратилади, йирик қорамоллар учун ем ишлаб чиқариш йўлга қўйилади, Қонликўл туманида картошканинг “Holland”, “Mozika”, “Santa”, шунингдек, Покистон экспортбоп “Басмати” гуручи навларини етиштириш режалаштирилган.

Шу билан бирга, покистонлик тадбиркорлар Nukus City ҳудудида кўп қаватли “The Arkadians” турар-жой мажмуасини қуриш масаласини ўрганиб чиқишга келишдилар.

Покистонлик сармоядорларнинг Қорақалпоғистон Республикасига ташрифи натижалари минтақа иқтисодиёти тармоқларининг улкан имкониятлар ва кенг салоҳиятга эга эканлигини, шунингдек, маҳаллий тадбиркорларнинг ички ва ташқи бозор учун кенг турдаги маҳсулотлар ишлаб чиқаришни кенгайтириш учун хорижий шериклар билан кўп қиррали ҳамкорликка тайёрлигини яна бир бор намойиш этди.

Таржима: Хорижий инвестицияларни жалб этиш агентлиги

Манба:https://dunyo.info/