Канада экспортни ривожлантириш корпорацияси билан ҳамкорликни кенгайтириш имкониятлари муҳокама қилинди

Ўзбекистоннинг АҚШдаги элчихонаси Канада экспортни ривожлантириш корпорациясининг Евросиё бўйича бош вакили Дарси Феррон, Европа, Яқин Шарқ ва Африка бўйича минтақавий директори Роберт Кемерон билан музокаралар ўтказди.

Видеоконференцияда элчи Жавлон Ваҳобов йирик инвестиция лойиҳалари доирасида республиканинг хорижий молия институтлари билан ҳамкорлигининг устувор ёналишлари ҳақида батафсил сўзлаб берди. Жаҳон банки, Халқаро валюта жамғармаси, Осиё тараққиёт банки, Европа тикланиш ва тараққиёт банки, Ислом тараққиёт банки, Европа инвестиция банки ва бошқа халқаро молиявий институтлар, шунингдек, хорижий экспорт кредит агентликлари каби халқаро ташкилотлар билан ҳамкорлик қилишга алоҳида этибор қаратилаётгани айтиб ўтилди.

Шунингдек, иштирокчиларга нефт-газ ва тоғ-кон саноати, машинасозлик, қишлоқ хўжалиги, озиқ-овқат саноати, тўқимачилик, туризм ва бошқа соҳалар ҳақида батафсил малумот берилди.

Дарси Феррон Ўзбекистонда амалга оширилаётган иқтисодий ислоҳотлар ва чет эл бизнеси учун очилаётган имкониятларни ҳисобга олган ҳолда, Канада экспортни ривожлантириш корпорацияси республика ҳукумати ва молиявий институтлари билан ҳамкорликни кенгайтириш масаласини катта қизиқиш билан ўрганилаетганини таъкидлади. Корпорация Канада компанияларидан аризалар келиб тушса, Ўзбекистондаги инвестиция лойиҳаларини молиялаштириш бўйича таклифларни қабул қилишга таёр экани малум қилинди.

Канада экспортни ривожлантириш корпорациясининг Истанбулдаги ваколатхонаси Ўзбекистон ёналишини мувофиқлаштиради, шунингдек республикада бизнес қилишни режалаштирган Канада компанияларига ёрдам беради. Дарси Ферронга кўра, сўнгги беш йил ичида корпорация Ўзбекистонга, асосан, қишлоқ хўжалиги ва тоғ-кон саноатини ривожлантириш учун Канада компаниялари ҳамда 4 та кичик ва ўрта корхонага 7,6 миллион доллар ажратган. Суҳбат давомида корпорация вакиллари элчихонанинг Ўзбекистонда Канада илғор технологиялари асосида гўшт ишлаб чиқаришни ташкил этиш бўйича инвестиция лойиҳаларини амалга ошириш имкониятларини кўриб чиқиш тўғрисидаги таклифини қўллаб-қувватлади. Элчининг такидлашича, 2020-йил республикада чорвачилик соҳасида 84 янги лойиҳа амалга оширилади ва гўштни қайта ишлаш корхоналари ташкил этилади.

Музокараларда Ўзбекистон қишлоқ хўжалиги вазирлиги делегациясининг мол гўшти етиштириш ва экспорт қилиш, шунингдек, қорамоллар сони бўйича Канадада етакчи бўлган Алберта вилоятига ташрифини ташкил этиш масаласи муҳокама қилинди.
Учрашув якунида Канада экспортни ривожлантириш корпорацияси вакиллари Ўзбекистон бозорига кириш ва бизнес лойиҳаларни амалга оширишдан манфаатдор бўлган Канада компаниялари билан ҳамкорликни ўрнатиш имкониятларини ўрганишни тасдиқлади. Шунингдек, Канада томони республикага инвестиция лойиҳаларини тақдим этиш учун Канада бизнес ҳамжамияти орасида қўшма онлайн-бизнес брифингларни ташкил этишга таёрлигини билдирди.