ЭНЕРГЕТИКА ВАЗИРИНИНГ “ФОЛЬКСВАГЕН ГРУП РУС” БИЛАН МУЗОКАРАЛАРИ

2022 йилнинг 7 февраль куни Ўзбекистон Энергетика вазири Алишер Султанов Тошкент шаҳрида “Фольксваген Груп Рус” МЧЖ бош директори Штефан Меха бошчилигидаги делегация аъзолари билан музокаралар ўтказди.

Музокаралар чоғида чет эл томонига яқин йилларда Ўзбекистонда “Евро-5” синфидаги автомобиль ёқилғиси, жумладан, бензин ва дизель ёқилғиси ишлаб чиқаришни ривожлантириш режалари ҳақида маълумот берилди.

Хусусан, 2021 йилнинг декабрь ойида Ўзбекистонда Шўртан газ-кимё мажмуасининг тозаланган метан асосида синтетик суюқ ёқилғи ишлаб чиқариш бўйича GTL заводи ишга туширилгани, бу эса “Евро-5” стандарти талабларига жавоб берадиган дизель ёқилғиси ишлаб чиқариш ҳажмини сезиларли даражада диверсификация қилиш ва ошириш имконини бериши таъкидланди. Корхонанинг лойиҳа қуввати йилига 307,3 минг тонна керосин, 724,6 минг тонна дизель ёқилғиси, 437,3 минг тонна нафта, 53,4 минг тонна суюлтирилган газ ишлаб чиқаришни ташкил этади.

Бундан ташқари, Бухоро нефтни қайта ишлаш заводини модернизация ва реконструкция қилиш лойиҳаси амалга оширилмоқда, бунинг натижасида 2025 йилдан бошлаб 1,75 миллион тонна “Евро-5” стандартидаги нефть маҳсулотларини ишлаб чиқариш режалаштирилган.

Ўзбекистонда электромобиллар ишлаб чиқариш каби йўналишнинг ривожланиши “Фольксваген Груп Рус” МЧЖда катта қизиқиш уйғотди. Ҳозирги вақтда Ўзбекистонда электромобиллар олиб киришда акциз солиғи ва божхона тўловлари олинмайди. Бир қатор ёқилғи қуйиш шохобчалари негизида электромобилларга ёқилғи қуйиш шохобчалари фаолият кўрсатмоқда ва бу йўналишда хусусий тадбиркорлик субъектлари ривожланиб бораётгани қайд этилди.

Хорижий делегация аъзолари Ўзбекистонда 2030 йилга бориб умумий энергетика балансидаги улуши камида 25 фоизни ташкил этиши режалаштирилган қайта тикланувчи энергия манбалари(ҚТЭМ)ни ривожлантириш бўйича олиб борилаётган ишлар билан ҳам танишди. Бу йўналишда 2021 йилда 100 МВт қувватга эга биринчи қуёш фотоэлектр станцияси ишга туширилди, иккинчиси эса 2022 йилнинг март ойида фойдаланишга топширилиши кутилмоқда. 2024 йилда умумий қуввати 2,2 ГВт бўлган қайта тикланувчи энергия манбалари объектларини, шунингдек, қуввати 326 МВт бўлган ГЭСларни ишга тушириш режалаштирилган.

Учрашувда томонлар қўшма лойиҳаларни амалга ошириш имкониятлари юзасидан фикр алмашдилар, истиқболли таклифларни батафсил кўриб чиқишга келишиб олдилар.

 

minenergy.uz