Berlin Economics тадқиқот гуруҳи билан COVID – 19 пандемиясининг хорижий инвестицияларга таъсири муҳокама қилинди

Июн ойининг бошида, Ўзбекистон Республикасининг Германия Федератив Республикасидаги элчихонаси кўмагида Berlin Economics тадқиқот гуруҳи, Хорижий инвестицияларни жалб этиш агентлиги, Инвестиция лойиҳаларини ишлаб чиқиш маркази ва Тараққиёт стратегияси маркази иштирокида видеоконференция ташкил этилди.

Тадбирда инвестиция фаолиятини амалга оширишда COVID-19 пандемиясининг таъсири ҳамда агентликлар томонидан инвестицияларни рағбатлантириш бўйича кўрилаётган дастлабки чоралари муҳокама қилинди.

Berlin Economics мутахассислари коронавирус пандемияси билан боғлиқ жаҳон иқтисодий тенденциялар ҳақида ва инвестицияларни жалб қилиш циклини янада рағбатлантириш бўйича тавсияларни тақдим этишди.

— Чегаралар, ишлаб чиқариш корхоналари, қурилиш майдонларининг вақтинчалик ёпилиши инвестиция лойиҳаларини тайёрлаш ва амалга оширишда бевақт кечикишларга олиб келади, — деди Berlin Economics эксперти Бьорн Фоглер ўз тақдимотида, — «ЮНКТАД ва ОСЭР башоратларига кўра, таклифлардаги чекловлар, ташқи талабнинг кескин ўзгариши ва инвесторлар умумий ишончининг пасайиши, 2020 йилда глобал тўғридан-тўғри инвестициялар ҳажми 2019 йилга нисбатан 30% га камайиши мумкин.

Учрашув иштирокчилари аҳолининг ишбилармонлик фаоллиги даражасини сақлаб туриш ва COVID-19 пандемиясининг иқтисодий оқибатларини юмшатиш бўйича Ўзбекистонда амалга оширилаётган чора-тадбирлар тўғрисида тўхталар экан, иқтисодиётнинг турли соҳалари, банк сектори ва кичик, ўрта ва йирик бизнесни  қўллаб-қувватлаш бўйича ўз вақтида мақсадли дастурий чоралар кўрилганини таъкидладилар.

Хорижий инвестицияларни жалб этиш агентлиги раҳбарияти коронавирус инфекциясининг тарқалишига қарши курашиш, тадбиркорликни қўллаб-қувватлаш ва иқтисодиёт тармоқларининг барқарор ишлашини таъминлаш мақсадида 1,0 миллиард доллардан ортиқ бюджетга эга Инқирозга қарши фонд ташкил этилганини маълум қилди. Барча масалаларни комплекс қамраб олиш ва бизнес соҳасидаги муаммоларни ўз вақтида бартараф этиш мақсадида Экспортёрлар ва тадбиркорларни қўллаб-қувватлаш бўйича тезкор Республика штаби ташкил этилди.

Немис мутахассисларининг фикрича, мамлакатнинг инвестицион жозибадорлигини сақлаб қолиш учун ички ресурсларни фаоллаштириш, эркин иқтисодий зоналарни ривожлантириш, ҳудудларда кластерлар яратиш, капитални қайта инвестициялаш ва бошқа тадбирларни қамраб оладиган инвестицияларни жалб қилишнинг комплекс концепциясини ишлаб чиқиш керак.

Инвестицияларни жалб қилиш бўйича масъул идоралар ўзларининг стратегик вазифаларида бугунги кунда узоқ муддатли истиқболда иқтисодиётнинг барқарорлигини оширишга замин яратиши мумкин бўлган соҳаларга эътибор берган ҳолда мақсадли аудитория манфаатларини қайта кўриб чиқишлари лозим. Веб-сайтлар, ижтимоий тармоқлар ва виртуал етакчилик орқали рақамли маркетинг ва рақамли хизматларга асосий эътиборни бериб, бозорга кириш стратегиясини янгилаш жуда муҳимдир.

Рақамли интеграцияга қаратилган соғлиқни сақлаш, биотехнология, фармацевтика, электрон тижорат, кибер-хавфсизлик каби билим ва технологияларга асосланган саноат ва соҳалар пандемия даврида барқарор ўсиш ва инвестициялар динамикасини намойиш этаётганлиги таъкидланди.

Учрашув якунида Berlin Economics вакиллари Хорижий инвестицияларни жалб этиш агентлиги ва Инвестиция лойиҳаларини ишлаб чиқиш маркази билан янги шароитларда чет эл капитални жалб қилишнинг самарали механизмларини жорий этиш борасида таклифларни ишлаб чиқиш бўйича ҳамкорликни ривожлантиришга тайёрлигини билдирди. Шунингдек, ички инвестицияларни рағбатлантириш ва ишбилармон аҳолининг салоҳиятини рўёбга чиқариш, иш ўрни ва фуқароларнинг ўзини банд қилиш билан таъминлаш бўйича мамлакат ҳудудида «Лойиҳалар фабрикаси» концепциясини ишлаб чиқиш таклиф қилинди.

Таъкидлаш жоизки, Berlin Economics Германия иқтисодиёт ва энергетика федерал вазирлиги топшириғига биноан иқтисодиёти ўтиш даврида бўлган мамлакатлар ҳукуматларига иқтисодий сиёсатнинг турли жиҳатлари бўйича маслаҳат бериш ҳамда мустақил таҳлил асосида тегишли тавсиялар тайёрлаш билан шуғулланади.