Ирландиянинг «International Development Ireland Ltd.» компанияси билан видеоконференция ўтказилди

Ўзбекистон Республикасининг Буюк Британия ва Шимолий Ирландия Бирлашган Қироллигидаги элчихонаси ва Хорижий инвестицияларни жалб этиш агентлиги ҳамкорлигида Ирландиянинг International Development Ireland (IDI) компанияси бош директори вазифасини бажарувчи Шон Маккеллин раҳбарлигидаги ташкилот вакиллари билан видеоконференция бўлиб ўтди.

Тадбир Ўзбекистоннинг сармоявий жозибадорлигини кенг ёритиш, шунингдек, халқаро майдондаги имижини янада оширишга бағишланди.

Таъкидлаш жоизки, IDI асосий эътиборни институтционал ва корпоратив ривожланиш асосидаги лойиҳаларни амалга оширишга қаратади. Бунга инвестициялар, экспорт, махсус иқтисодий зоналар, инновациялар ва илмий-тадқиқот, банк, сайёҳлик, соғлиқни сақлаш, шунингдек, кичик ва ўрта бизнесни рағбатлантириш каби соҳалардаги институтционал мустаҳкамлаш ҳамда самарали механизмлар орқали эришилади.

Учрашув чоғида Хорижий инвестицияларни жалб этиш агентлиги раҳбарияти иштирокчиларни Агентлик фаолияти, жумладан, хорижий инвесторларга зарур ахборот ва ҳуқуқий кўмак бериш бўйича вазифалари хусусида сўзлаб берди. Шунингдек, Ўзбекистоннинг инвестициявий жозибадорлиги тўғрисида тақдимот ўтказди. Унда мамлакатимиз эркин иқтисодий зоналарида яратилган шарт-шароитлар, хусусан чет эллик инвесторларга тақдим этилаётган божхона ва солиқ имтиёзлари ҳамда республикамизда хорижий компанияларнинг ваколатхоналарини очиш тартибига алоҳида тўҳталди.

Ўз навбатида, Ш.Маккеллин таъкидлаганидек, IDI инвестициявий салоҳиятни, шу жумладан, хорижий агентликларнинг институтционал имкониятларини олға суриш, эркин иқтисодий зоналарни бошқариш, экспорт салоҳиятини ривожлантириш, кичик бизнесни қўллаб-қувватлаш ва рағбатлантириш билан шуғулланади, шунингдек, инвестиция лойиҳаларини ишлаб чиқиш ва амалга оширишда катта тажрибага эга.

Учрашув якунига кўра, “Хозарасп” ЭИЗ ҳудудида лойиҳаларни амалга оширишга хорижий компанияларни жалб қилиш, шунингдек, мева-сабзавотларни қайта ишлаш ҳамда кейинчалик Европа Иттифоқи ва Бирлашган Қироллик бозорларига экспорт қилиш учун маҳсулот ишлаб чиқаришни йўлга қўйиш мақсадида Ирландия компанияси билан ўзаро манфаатли ҳамкорлик масалаларини ўрганиш бўйича келишувга эришилди.