Полшадан нигоҳ: Ўзбекистон сўнгги йилларда амалга оширилаётган ижтимоий-иқтисодий ислоҳотлардан манфаатдор

Полшанинг “Obserwator logisticzny” (“Логистика кузатувчиси”) интернет порталида “Ўзбекистондаги бизнес – Полша логистика компаниялари учун ажойиб имконият” сарлавҳали мақола чоп этилди.

Мақолани 24-26 март кунлари Полша тадбиркорлари миссияси доирасида Тошкент халқаро инвестиция форумида иштирок этган Ўзбекистоннинг Полшадаги фахрий консули Пиотр Котсон тайёрлади.

Мақола муаллифининг таъкидлашича, ташкилотчилар ўз олдига Ўзбекистон иқтисодиётининг энг фаол тармоқлари вакиллари ва ўз бизнесини ривожлантиришнинг янги йўналишларини излаётган инвесторларни бир жойга тўплаш вазифасини қўйган. Унинг фикрича, Ўзбекистон катта салоҳиятга эга, айниқса, дунёдаги геосиёсий вазият бир вақтнинг ўзида кўплаб субъэктларни қийин аҳволга солиб қўйган бир пайтда. Бошқа томондан, бу бутунлай янги имкониятларни очади.

“Ўзбекистон инвесторлар учун қизиқарли бозор”, — дейилади мақолада. – Олтин, уран, кумуш, волфрам ёки мис каби кўплаб турдаги хом ашё ва табиий конлардан фойдаланиш имконияти билан ажралиб туради. Шунингдек, у кадмий ва висмут каби нодир металлар ишлаб чиқарувчиси ҳисобланади. Нефт, газ ёки кўмир каби энергия ресурслари мамлакатнинг ўз эҳтиёжларини бемалол қоплаш, шунингдек, экспорт ҳамкорлигини йўлга қўйиш учун етарли. Кимё, автомобилсозлик ва машинасозлик саноати ҳам динамик ўсишни бошдан кечирмоқда”.

Полшалик тадбиркорларнинг сафаридан мақсад нафақат Халқаро инвестиция форумида иштирок этиш, балки биринчи навбатда маҳаллий ишбилармонлар ва Ўзбекистон ҳукумати вакиллари билан учрашувлар ўтказиш эди.

“Бизнинг иқтисодий миссиямизни ташкил этишда тадбиркорлар ва ҳукумат вакиллари катта ёрдам беришди. Ҳамкорлик туфайли биз мамлакат иқтисодиётининг кўплаб тармоқларида инвестиция режаларига тўлиқ мос келадиган янги алоқаларни ўрнатишда ҳар томонлама ёрдамга ишонишимиз мумкин эди. Полша ва Ўзбекистон томонлари учун муваффақиятли бўлган ташриф давом этади”, — деб ёзади фахрий консул.

Шу билан бирга, у Полша ва Ўзбекистон ўртасидаги ҳамкорлик салоҳияти фақат хомашёга бўлган қизиқиш билан чекланиб қолмаслигини – у анча кенг доирани қамраб олгани, логистика эса қизиқарли йўналишлардан бири бўлиб чиққанини қайд этади. Шу тариқа, ташриф доирасида Полшанинг Świat Przesyłеk компанияси президенти “Ўзбекистон почтаси” бош директори Алишер Файзуллаев билан учрашгани маълум қилинди. Томонлар курерлик ва почта соҳаларини ривожлантириш масалаларини муҳокама қилдилар, натижада ҳамкорликни бошлаш режалари белгилаб олинди.

Дунёда, жумладан, Ўзбекистонда почта ва курерлик хизматларига талаб ортиб бораётгани, электрон тижоратнинг сезиларли даражада ривожланаётгани очиқ ҳамкорликни рағбатлантирмоқда. Фахрий консул ташаббуси билан бошланган иқтисодий миссия Ўзбекистон томони томонидан давом эттириладиган ва қўллаб-қувватланадиган лойиҳадир. Тошкентга навбатдаги саёҳат 2022-йилнинг май ойига мўлжалланган.

– Ўзбекистон кейинги йилларда амалга оширилаётган ижтимоий-иқтисодий ислоҳотлардан манфаатдор, – дейди муаллиф. «2021 йилда Полша экспорти 2020 йилга нисбатан 138,4 фоизга ўсди ва бу бутун иқтисодиёт учун энг жозибадор бозорлардан бирига айланди».

 

Манба: dunyo.info