Инвестиция ва ишбилармон доираларнинг халқаро конференцияси

2020 йил 4 сентябрда Ўзбекистон Республикаси Олий Мажлиси Сенати Раисининг биринчи ўринбосари Содиқ Сафоев ривожланаётган мамлакатларнинг иқтисодий аҳволи, инвестиция муҳити ва бозорларидаги имкониятлар тўғрисида маълумот беришга бағишланган ««Frontier Investor Days»» халқаро онлайн-конференциясида иштирок этди.

Тадбирда 100 дан ортиқ банк ва молия институтлари, инвестиция компаниялари, пенсия ва хедж фондлари, шу жумладан ЕБРР, HSBC, Blackrock, Fidelity, BCR Private Pension Fund, Sandglass capital advisors (UK) ltd, Dunross & Co, InterCapital Asset Management, Karoll Capital Management, Metzler Asset Management GmbH ва бошқалар.

Болгария, Қозоғистон, Руминия, Словения, Украина, Хорватия ва Ўзбекистон каби мамлакатлар учун иқтисодий ривожланиш масалаларига бағишланган алоҳида сессиялар ташкил этилди.

Халқаро конференциянинг алоҳида сессияси Ўзбекистоннинг иқтисодий салоҳияти ва капитал бозорлари ривожига бағишланди. Унда сўзга чиққан Содиқ Сафоев иштирокчиларни коронавирусга қарши кураш бўйича Ўзбекистоннинг тажрибаси ва пандемия шароитида мамлакатда иқтисодий вазият барқарорлигини таъминлаш бўйича кўрилаётган чора-тадбирлар тўғрисидаги маълумот билан таништирди. Ўзбекистонда капитал бозори ривожланишининг ҳолати ва истиқболлари, шу жумладан мамлакатда Халқаро молия марказини яратиш режалари, шунингдек хусусийлаштириш жараёнлари ва давлат иштирокидаги корхоналарнинг инвестициявий жозибадорлигини таъминлаш бўйича чора-тадбирлар тўғрисида батафсил тақдимот ўтказилди.

Коронавирус пандемияси натижасида келиб чиққан иқтисодий инқироз фонида ҳам барқарор иқтисодий ўсиш, мамлакатнинг халқаро рейтингдаги мавқеининг ошиши ва халқаро фонд бозорига муваффақиятли кириш кузатилди.

Конференция қатнашчиларига тадбиркорларни қўллаб-қувватлаш чоралари, иқтисодий ва инвестиция қонунчилигини такомиллаштириш тўғрисида маълумот берилди. Таъкидланганидек, бугунги кунда Ўзбекистон чет эл инвестициялари ва ишбилармонлик фаолиятини янада рағбатлантириш учун очиқдир.