“Наманган” ЭИЗ ҳудудида “Hyundai Motors UZ Namangan” ҚК ташкил этилади

Наманган вилояти ҳокими Хайрулло Бозоровнинг таклифига биноан мамлакатимизнинг Сеулдаги элчихонаси томонидан Корея Республикасининг Савдо, саноат ва энергетика вазирлиги ҳузуридаги Корея-Ўзбекистон бизнес уюшмаси раисининг биринчи ўринбосари Ким Чанг Кеон бошчилигидаги делегациянинг вилоятга ташрифи уюштирилиб, қўшма инвестиция лойиҳаларини амалга оширишни жадаллаштириш масалалари муҳокама қилинди.

22 сентябр куни Наманган шаҳрида Ким Чанг Кеон ва вилоят ҳокими Хайрулло Бозоров ўртасида учрашув бўлиб ўтди. Музокаралар чоғида, шунингдек, “Evergreen Motors” компанияси автомобилсозлик бўйича ижрочи вице-президенти Ким Ик Донг, “Hyundai Motors UZ Namangan” қўшма корхонаси раҳбари Ким Ёнг Чол ва Корея-Ўзбекистон бизнес уюшмасининг Ўзбекистондаги ваколатхонаси Юн Джун Сок, шунингдек, вилоят ҳокимлиги масъул шахслари иштирок этишди.

Тадбир чоғида “Наманган” эркин иқтисодий зонаси ҳудудида “Hyundai” тижорат транспорт воситаларини ишлаб чиқариш заводини қуриш бўйича лойиҳанинг кейинги амалий босқичлари тўғрисида муҳокамалар олиб борилди ва келишувларга эришилди. Таъкидланишича, Жанубий Кореянинг “Hyundai Motors” компанияси инвестиция лойиҳасининг техник параметрларини ҳал қилиши билан лойиҳа 2020 йил октябр ойининг охирига қадар бошланади.

Шунингдек, “Наманган” ЭИЗ даги автомобил заводи учун ажратилган ҳудудга ушбу иншоотни қуриш режалари билан танишиш мақсадида ташриф буюрилди. Бундан ташқари, тижорат транспорт воситалари учун эҳтиёт қисмлар ва бутловчи қисмларни маҳаллийлаштиришга қаратилган, шу жумладан Корея-Ўзбекистон бизнес уюшмасига аъзо компанияларни жалб қилган ҳолда истиқболли қўшма лойиҳалар бўйича фикр алмашилди.

https://www.uzdaily.uz/