Эроннинг «Rassan Industrial Group» компанияси делегацияси билан учрашув бўлиб ўтди

Мамлакатимизнинг Эрондаги элчихонаси кўмагида нуфузли «Rassan Industrial Group» компанияси бош директори Аббос Маржани бошчилигидаги компания вакиллари ва Хорижий инвестицияларни жалб этиш агентлиги мутахассислари билан учрашув ташкил этилди.

Санитария-техник воситалар ва ускуналарини ишлаб чиқаришга ихтисослашган Эроннинг «Rassan Industrial Group» компанияси вакиллари қўшма инвестиция лойиҳасини амалга ошириш учун таклиф қилинган имкониятларни муҳокама қилиш ва ўрганиш мақсадида Тошкентга келишди.

Музокаралар давомида А.Маржани компания фаолияти тўғрисида қисқа тақдимот олиб борди. Таъкидланишича, «Rassan Industrial Group» Эрон ва ташқи бозорда кенг намойиш этилмоқда. 20 йилдан ортиқ вақт мобайнида компания турли хил санитария-гигиена маҳсулотларини, шу жумладан, жўмрак, клапанлар, каскадли, сенсорли ва бошқа ошхона ҳамда ҳаммом аралаштиргичларини ишлаб чиқаради. Компания маҳсулотлари Ироқ, Афғонистон, Ливан, Сурия, Уммон, Арманистон, Россия, Қувайт ва бошқа мамлакатларга экспорт қилинади.

Компания вакиллари экспорт географиясини янада кенгайтириш учун Ўзбекистон бозорига қизиқиш билдиришларини таъкидладилар. Шу мақсадда ишлаб чиқаришни Ўзбекистон ҳудудларидан бирида ташкил этиш таклифи илгари сурилди. Айни пайтда компания мамлакатдаги иқтисодий вазиятни, мавжуд ресурсларни ва инфратузилмани ўрганиш учун бозорнинг маркетинг тадқиқотларини бошлади.

Агентлик мутахассислари томонидан Ўзбекистонда яратилган имкониятлар, инвестиция фаолияти соҳасида амалдаги қонунчилик ҳақида, тақдим этилаётган имтиёз ва преференциялар, шунингдек, лойиҳани амалга ошириш учун ер ажратиш тартиби тўғрисида маълумот берилди.

Учрашув якунида бўйича Эрон делегациясидан қўшимча равишда кенгайтирилган сўровнома тайёрланиб, Хорижий инвестицияларни жалб этиш агентлигига юбориш борасида келишувга эришилди.

Шунингдек, «Ўзсаноатқурилишматериаллари» уюшмаси мутахассислари иштирокида қурилиш материаллари ишлаб чиқариш соҳасидаги лойиҳаларни амалга ошириш босқичларини батафсил муҳокама қилиш учун 18 феврал куни иккинчи учрашувни ташкил этиш тўғрисида келишиб олинди.